Dolanan Layangan nang Tambakagung, Klirong, Kebumen

Posted by Jagading Wacana Label:

Salah sijine dolanan sing ana ing mangsa ketiga kuwe layangan. Kaya dene pas dina Setu wingi, cah-cah desa Tambakagung, Klirong, Kebumen pada meng sawah, dolanan layangan. Kuwi kira-kira jam 16.00 an.
“Biasane sih nek sore pada pit-pitan golet maghrib, ning wong siki jamane ketiga dolanan layangan lewih nyenegi,” kuwi kandhane cah-cah desa Tambakagung Klirong Kebumen sing lagi pada layangan.
Ora mung bocah-bocah desa Tambakagung, Klirong, Kebumen, cah-cah desa liyane uga akeh sing layangan. Saiki yen wayah sore, yen mandeng nduwur ana wektu sore weruh layangan mabur. Macem-macem bentuke, ana sing biasa, kaya dene layangan petekan gedug layangan blapangan, lan layangan sing aneh-aneh bentuk karo jenenge.
Ana ing desa Kebadongan, Klirong, Kebumen saumpamane, malah ana layangan sing ana lampune. Layangane mabure ana wayah wengi, sekang ngisor keton lampune kerlip-kerlip. Dudu amung balon, sendarene (kaya sirine) uga meraung-raung. Monine kaya motor mabur lan yen dipandeng karo dirungokna asih banget.
Yen mandeng layangan sing werna-werna kuwi, jelas sing dolanan layangan ora mung cah cilik. Ananging wong tua uga akeh sing layangan. Ana ing kasunyatan, layangan kuwi ora ngenal umur, bocah cilik, wong enom karo wong tua uga pada dolanan layangan.
Layangan pancen hiburan rakyat tenanan, misale ana sing gawe kegiatan lomba layangan, ora perlu internasional internasionalan, nanging antar desa wae, kayake apik. Bisa dadi wisata sing bisa kanggo hiburan, tur mendidik.
FEATURE
Dening
Budi Sih Yuliarini( 10205244011)

2 komentar

Sunset ing Klirong Kebumen Ora Kalah karo Pulau Dewata

Posted by Jagading Wacana Label:



S
unset biasane diartekake padha karo sumuruping surya ana ing pesisir. Pangerten kaya kuwi ateges sunset ana ing pikiran umum, ananging satenane kurang trep yen diartekake kaya kuwi amarga sunset kuwi bisa ana ngendi wae. Sumuruping surya kuwi ora kudu dideleng saka pesisir utawa pantai nanging uga bisa dideleng saka sawah. Kaya sore ing dina kepungkur nalika  jam 16.35 WIB, Jum’at, 26 Oktober 2012 sunset tansah endah bunder memet kaya bal seka emas. Ana ing dalan tengah sawah sak Lor-e kantor pos Klirong sunset keton endah kang kaendahane ora kalah karo sunset ana ing Pulau Dewata,  anane sunset tansaya nggawe bombonge ati marang keagungane Gusti Allah kang Maha Endah. Sunset kuwi mau bisa dideleng mawi mripat telanjang ora perlu nganggu alat bantu liyane, serta jelas banget. Sunset kang ana ing Desa Klirong Kebumen bisa mbuktekaken yen taksih akeh alam padusunan kang edi. Apa kang ana kuwi kudu dijaga amarga pansen saktenane kaendahan alam mesti bakal ana gandheng cenenge karo gesange manungsa sahingga ayok dijaga bebarengan kanggo kabecikane kabeh.
STRAIGHT NEWS
Dening
Budi Sih Yuliarini (10205244011)

0 komentar

Kampung Magic Community (KMC)

Posted by Jagading Wacana Label:



Kampung magic community yaiku salah satunggaling  paguyuban ingkang wonten ing Kebumen, mliginipun babagan magic utawa sulap. Ingkang dados  anggotanipun inggih menika tiyang ingkang remen kaliyan sulap lan saged dolanan sulap. KMC ngadeg taun 2010. Ingkang ngedegaken yaiku Mas Damar Baros lan dipunketuani dening Bapak John Silombo. Dumugi saniki KMC kirang langkung sampun gadhah anggota 50 tiyang. KMC gadhah motto “Kampung Magic The Miracelle of Live.”
KMC menika ngadeg awit saking wontenipun Kampung Cina ing daerah Kebumen, mliginipun Sedayu Gombong. Papan kangge nglumpuk anggota KMC wonten ing Alun-alun Kebumen. Sadurunge wonten Alun-alun, papanipu wonten Radio Bima Sakti Kebumen.
Acara ingkang sampun kulina dipunlampahi yaiku magic street. Magic street yaiku para pweulap dolanan sulap wonten ing margi kangge nglipur tiyang ingkang sami mlampah tanpa bayaran. Magic street  asring saged dipuntingali saben minggu ndalu ing Alun-alun Kebumen. Acara menika gadhah ancas kangge nggladhi mental lan supaya saya kulina kaliyan  sulap ingkang dipun badhe  tontonaken. Wonten magic street sulap ingkang ssaged dipuntingali yaiku sulap ingkang sampun umum lan entheng, langkung asring dolanan kartu, koin lan tongkat. Sanesipun magic street, KMC ugi nderek lomba-lomba sulap, kayata “Tegal Magic Competition.”

FEATURE 
DENING : WIJI BUDI LESTARI (10205244021)

0 komentar

Idul Adha Mbludak

Posted by Jagading Wacana Label:



Jumat 26/10/2012        Suwuk salah satunggaling Pantai ing Kebumen menika, kala riyaya bada Idul Adha rame sanget. Kathah ingkang sami dolan utawa namung refresing sareng kulowarga utawa kanca-kanca. Parkiran mobil lan motor kebak sedanten. Ameh mirip kaliyan kala bada Idul Fitri.

“Nembe lebaran Idul Adha kiye mba. Mule taun kiye rame banget. Kiye ya ora nyangka, malah perkiraan ramene mule dina setu minggu. Adan taun 2012 ya ora rame kaya kiye. Malah sepi.” Ngendikane Pak Yahya minangka Kepala obyek wisata suwuk nalika dipunwawancara.
Pengunjung nalika Idul Adha iki pancen kathah sanget. Petugasipun sami ngantos kuwalahan ngadani para pengunjung wau. Amarga mboten sami nyana menawi dinten menika bakal rame. Dipunbandhingaken kaliyan taun-taun kepungkur, taun 2012 iki paling rame. Asiling karcis nganti 6yuta. Biyasane 4yuta wau asiling karcis seminggu wonten Suwuk. Nanging bada menika 6yuta kanggo asil karcis awit jam 1 ngantos sonten  kinten-kinten jam 5.30. Asiling dana karcis Pantai Suwuk saben taunipun menika saged nutup dana APBD Kabupaten Kebumen saking 9 obyek wisata ingkang wonten. Pantai Suwuk menika pancen saweg kondhang wonten ing Kebumen. Jumlahipun pengunjung saben taun langkung nginggil lan ngluwihi pathokan (target) ingkan dipuntetepaken dening pemerintah daerah.

Pawartos 
Dening : Wiji Budi Lestari (10205244021)

0 komentar

Terong , PIYE TA?

Posted by Jagading Wacana Label:


  Terong inggih menika salah satunggaling desa ingkang papanipun wonten ing sak kidulipun pathuk wonosari saha sak wetanipun Pleret .Desa ingkang alamatipun wonten ing Terong Dlingo Bantul Yogyakarta menika gadah sejarah anggenipun dados desa menika. 
Wonten ing jaman rumiyin wonten salah satunggaling perang. inggih menika prajurit Mataram ingkang nama Ki Potrojiwo ingkang nyingkir wonten ing ngayogyakarta sisih wetan kerajaan Mataram. Sarta mbeta sisihanipun saha putranipun ingkang nama Nyi Jopotro kaliyan putunipun inggih menika Trononggo  non inggih larenipun Nyi Jopotro. Sasampunipun Ki Potrojiwa tilar donya ingkang dipun sarekaken wonten ing gunung sentono ingkang mapan wonten ing Piyungan, Lajeng Nyi Jopotro kaliyan putranipun nyingkir malih radi ngetan saking papan kekuasaanipun kerajaan mataram.Nyi Jopotro kaliyan Putranipun mlebet alas lajeng minggah ardi ingkang samenika dipun sebat Cinomati Sasampunipun wonten ing mriku Nyi Jopotro ningali  bilih kathah sanget wit – witan terong wonten ing mriku, lajeng papan menika dipun sebat alas terong kaliyan Nyi Jopotro.
Papanipun alasterong menika wonten ing pereng sasa tebih sanget kaliyan negara (kerajaan mataram), lajeng menika dipun pilih nyi Jopotro kagge papan anggenipun nglajengaken gesangipun kaliyan putranipun. Dangu – dangu papan menika (alas terong) dipun tekani kaliyang tiyang – tiyang ingkang badhe gesang wonten ing alas terong. Kathah – katahipun saking sisih kilen utawi ler sami kempal dados warga ing alas terong menika.
Putranipun Nyi Jopotro menika angsal kaliyan tiyang ingkang gesang wonten ing mriku lajeng gadah putra kalih inggih menika Trosentono kaliyan Tromenggolo. Lajeng menika Tononggo dipun dadosaken bekel wonten ing alas terong menika.  Amargi sampun sepuh, lajeng Trosentono dipun pilih dening Trononggo dados bekel nggantosaken ramanipun.  



Feature
Dening: Widha Prastawa (10205244005)



0 komentar

Tiyang Sepuh Kulina Dhahar Mengkudu

Posted by Jagading Wacana Label:


Gambar.  mengkudu wonten ing dalemipun Mbah Maryati
KEBUMEN- Mengkudu inggih punika salah satunggaling jinising woh ingkang kagolong kathah sanget pigunanipun. Sasanesipun dipunmangertosi amargi pigunanipun, woh mengkudu menika ugi dipunmangertosi amargi ambu lan raosipun ingkang kirang ecoh.  Amargi mambu lan raosipun ingkang kirang ecoh menika, kathahipun tiyang menika langkung remen dhahar mengkudu ingkang sampun dipunolah dumados pil utawa kapsul kangge pikantuk kasiatipun.
Kahanan kados mekaten benten sanget, kalihan pakulinanipun tiyang sepuh wonten ing Dusun Tamanwinangun Kecamatan Kebumen. Tiyang sepuh menika kulina dhahar woh mengkudu kangge njagi kasarasanipun. Tiyang sepuh menika langkung remen dhahar mengkudu ingkang taksih awujud woh tinimbang sampun awujud olahan pil utawa kapsul. Menawi dipuntakeni raosipun woh mengkudu menika, tiyang sepuh wonten ing Dusun Tamanwinangun kathahipun ngendhika menawi dhahar ingkang kapisanan menika raosipun boten ecoh ananging menawi sampun dangu lan kulina raos menika dumados ecoh.
Gambar. Mbah Maryati
Salah satunggaling tiyang sepuh ingkang namanipun Mbah Maryati ngendhika “kula menika sampun mangan pace (mengkudu) menika awit tasih enem. Pas rikala semanten kula nggih mboten remen amargi ambu lan raosipun boten ecoh ananging bapak lan ibu dhawuhi kula mangan woh menika. Lajeng kula asring mangan woh pace menika. Kasilipun kula ngraos, awakipun kula sehat lan seger saknajan yuswa kula sampun tuwa.” Mengkudu wonten ing Dusun Tamanwinangun ugi kasebut pace.
Wonten ing dalemipun tiyang sepuh ing dusun Tamanwinangun menika kathah ingkang gadah wit mengkudu. Saknajan yuswanipun tiyang sepuh menika sampun sepuh ananging awakipun taksih katingal seger lan sehat. Tiyang sepuh menika kathahipun mboten mangertos kandungan menapa kemawon ingkang kawontenan ing mengkudu. tiyang sepuh menika namung mangertos menawi mengkudu menika sae kangge kasarasan. Menawi saweg mumet, pegel, kesel lan lemes, tiyang sepuh menika ngobati penyakit menika kanthi dhahar mengkudu.
Sakjatosipun mengkudu menika ngandut zat nutrisi ingkang jangkep ingkang dipunperluake awak, kadosta protein, vitamin, lan mineral. Selenium menika salah satunggaling mineral wonten ing mengkudu kagolong antioksidan ingkang sae. Mengkudu menika ugi ngandut zat anti kanker, lajeng senyawa scolopetin kangge anti peradangan lan anti alergi, saha zat terpenoid kangge pambiyantu pemulihanipun sel-sel awak. 

Feature
Dening : Leni Tri Yulianingsih (10205244016)

0 komentar
Langganan: Postingan (Atom)